Elektronikkskúlin

Hvat er endamálið við Elektronikkskúlanum og hví er hann til?

Orðaða visiónin er:

“At føroyingar gera fleiri vørur við egnum elektronikki”  

- men tað liggja nógvir tankar aftanfyri hesa útsøgn.

Tá eg lærdi í Aarhus 2004-2008, bleiv eg púra ovfarin av at uppdaga at ein og hvør kann uppfinna sítt egna tól, menna tað og selja tað. Hetta er at skera alt yvir ein kamb, men tað passar. Tað krevst eingin útbúgving ella fyritøka fyri at byrja. Givið er at summi trygdarkrøv eru torfør at kanna og lúka, um man ikki kennur tey. Men tað eru fyritøkur í t.d. Danmark, sum ikki gera annað enn at kanna og góðkenna elektroniskar vørur fyri onnur.

Eftir lokna lærutíð + nøkur ár av arbeiði fluttu vit til Føroyar í 2012. Eg ætlaði at finna hinar fyritøkurnar sum teknaðu egnar printplátur. Men eg fann onga aðra, enn hana eg arbeiddi fyri, JT electric, nú GroAqua. Eg slapp at tekna 5 printplátur sum sótu í hvør sínum tóli. Tað var sera læruríkt og til tíðir ov stressandi. Í 2017 kom nýggj leiðsla, ið fekk til uppgávu av nevndini at fyritøkan sum heild skuldi leggja seg eftir at vera besti tænastuveitarin innan alivinnuna. Og hetta hevur gingið sera væl hjá teimum.

Tíverri fyri mítt viðkomandi merkti tað at verkætlanin sum eg var knýttur at, var niðurraðfest. Á várið 2018 sá eg lýsing frá el-breytini á Glasi og í august 2018 byrjaði eg at undirvísa har og eri har enn (feb 2025).

Tað er útfrá góðum møguleikum, vælvild frá leiðslu og ikki minst øll útgerðin á Glasi, sum hevur bygt upp til at Elektronikkskúlin varð settur á stovn. Eg kann ikki bestemma hvussu nógv Glasir ger við at undirvísa og útbreiða elektronikk, men troyti teir møguleikarnar eg finni og gleðist um hvørja lodding ið verður gjørd á ymsu breytunum á Glasi. Men eg kann byggja víðari sjálvur.

Tí bleiv navnið “Elektronikkskúlin” valt í 2020, heimasíðunavnið keypt og í nov 2022 var “ÍVF Elektronikkskúlin” stovnað við 100,- í eginpeningi.

Ynskir fyri framtíðina:

• At øll føroysk skúlabørn hava roynt at lodda eitt byggisett, so tey hava møtt elektronikki tíðliga í lívinum.

• At hava eitt “heim” har virksemið hjá Elektronikkskúlanum sleppur at veksa. Helst á einum almennum skúla, har fólk longu kenna umstøður osv. Ætlanin er at útgerð sum Elektronikkskúlin keypur eisini stendur tøk á skúlanum, og at við tíðini eigur skúlin útgerðina.

• At hava uppmuntrað ungum at arbeiða við hardware í ein sovorðnan mun at tey søkja víðari lærdóm innan elektronikk. Vælvitandi at tey áhugaverdastu størvini ikki enn eru at finna í Føroyum.

• At stuðlað undir at føroyskar fyritøkur uppbyggja lokalar førleikar innan printplátur, feilfinning og ikki minst printplátusniðgeving.

• At vera stuðlandi netverk fyri elektronikkfaktøkninga-lærlingar og -sveinar.

• At hava ein Elektronikkdag, ið kann uppbyggjast til eina føroyska elektronikkmessu, tvs ein minni útgáva av donsku E-24(sum skiftir navn alt eftir hvat árið er).

• At røkka varðanum, at ein føroyskment vøra, við egnum elektronikki í, sær dagsins ljós, UTTAN at eg havi verið blandaður uppí.